Balaang Santisima Trinidad, sa kanunay nagauban Ka kanamo niining among panaw sa kinabuhi nga puno sa pagtoo, paglaum ug paghigugma Kanimo Dios amahan, Dios Anak ug Dios Espiritu Santo. Sa daghang mga katuigan nga nanglabay Imo kaming giuban ug Imong gigiyahan ang among mga lakang aron kami dili mahitumpawak sa kadautan. Daghang salamat Balaang Santisima Trinidad nga Imo kaming gihatagan og langitnong manlalaban nga si Señor San Miguel Arkanghel, among patron nga gamhanan. Uban sa mga pangaliya ug panalipod sa among balaang patron kami nagpabiling gawasnon ug malipayon nga nagsabwag sa mensahe sa kaluwasan dinhi sa katilingbang Jagnaanon nga Imong giampingan ubos sa pandong sa Imong Diosnong kaalam nga balaan. Among nasinati sa among kinabuhi nga way puas Nimong gipadagayday ang nagsubwak Mong mga grasya ug panalangin. Kami nagapasalamat, nagadayeg ug nagasimba Kanimo Dios nga makagagahom nga bisan pa sa daghang mga pagsulay ug katalagman ang Imong gugma ug kalooy mihatag kanamo sa diosnong kaalam ug espirituhanong kusog aron kami mobarog nga magmabungahon, magmalampuson ug magmadaugon. Dios nga Amahan, sulod sa tulo ka gatos ug kapitoa’g lima nga mga katuigan kaming mga Jagnaanon gipanalipdan sa taming ug sa espada nga espirituhanon sa among mahal nga patron, si Señor San Miguel Arkanghel, batok sa gahom nga malimbongon. Kay ang TAMING nga iyang gipanalipod kanamo mao man ang among pagtoo nga gihuptan aron kami dili madutlan batok sa mga pana sa kadautan ug ang ESPADA nga iyang gitunol kanamo mao man ang Pulong sa Dios nga mopukan sa gingharian ni Satanas niining kalibutan. Aron human niining gubat nga among giatubang ang Imong ngalan pagadaygon sa tibuok kalibutan ug matukod ang Imong gingharian diha sa mga kasingkasing sa Imong katawhan. Dios nga Anak, samtang kami nangandam sa kausalogon sa júbilo niining among matahom ug mauswagon nga lungsod sa Jagna, among gihinumdoman ang among mga igsoon sa pagtoo nga mipanaw ug nahiuna na kanamo ug mipahulay nga malinawon, sila nga niugmad sa among pagtoong Katoliko. Nagmalipayon kaming nagahandum kanila kay gikan kanila among nadawat ang mga bunga ug grasya sa ilang mga pag-ampo ug pangaliya. Dios nga Espiritu Santo, samtang kami nagalantaw sa dugang pang mga kautigan nga umaabot kami nanghinaut nga ang Imong kaalam ug lamdag magagiya kanamo aron ang among pagtoo, paglaum ug paghigugma magapabilin sa among mga kasingkasing nga mapaubsanon ug mapasaloy-on. Nagaampo kami nga sa mga umaabot nga mga katuigan magapabiling mainiton kaming magasabwag sa samang pagtoong Katoliko nga migiya kanamo niining nanglabay nga tulo ka gatos ug kapitoa’g lima ka mga tuig. Naga-ampo usab kami nga ang katilingbanong diwa nga imong gigasa kanamo magpabiling maghaling sa kalayo sa among gugma alang sa katawhan niining lungsod sa Jagna.

Kini among gipangayo ubos sa pangaliya ni Señor San Miguel Arkanghel ug ubos sa inahanong paghigugma ug pag-amoma sa among Mahal nga Birhen Maria. Pinaagi kanila hinaut unta nga sa kanunay masinati namo ang Imong presenya diha sa among tagsa-tagsa ka kinabuhi. Kini among gipasalamat ug gipangayo kanimo Amahan sa Langit, Ikaw nga buhi ug hari uban ni Jesus Cristo imong bugtong Anak ug sa Espiritu Santo. Amen.